Last Modified: February 29 2012 14:31:20.
ദിക്കുബലി നടക്കുമ്പോൾ പണ്ടുപണ്ട്
എട്ടുദിക്കുകളും കൈവണങ്ങിടുമമ്മയെ കണ്ട്
ഇഷ്ടനാമമുരുക്കഴിക്കും കിളികളെക്കൊണ്ട്
അന്നും രക്തഗുരുതി കലക്കിവയ്ക്കാൻ കടലടുത്തുണ്ട്

ചണ്ഡമുണ്ഡാസുരന്മാർ‌തൻ മാർ പിളർന്നു തിളച്ച രക്തം
രണ്ടു കൈയ്യാൽ കോരിയമ്മ കുടിച്ചതിൻ ശേഷം
തൃപ്തിയാർന്നു കമിഴ്‌ത്തിവച്ചൊരു കിണ്ണമാകാശം
അതിൽ‌നിന്നിറ്റുവീഴുകയാണു രക്തകണങ്ങളനുനിമിഷം

ലോകരക്ഷയ്ക്കവതരിച്ചൊരു മായികേ നിൻ മഹിതചരിതം
ശോകനാശകമഭയവരദം ശുഭകരം തായേ
അഷ്ടബാഹുക്കളിലുമണിയുമൊരു ആയുധാഗ്നിയിൽ നീ
ഭഗവതി, ഭസ്മമാക്കുക സകലദുരിതവുമുഗ്രചാമുണ്ഡീ
(ദിക്കുബലി)