Last Modified: October 21 2020 10:36:22.
മീനവേനലിൽ രാജകോകിലേ
അലയൂ നീ അലയൂ
ഒരു മാമ്പൂ തിരയൂ
വസന്തകാലജാലകം മനസ്സിലിനിയും തുറക്കൂ
വീണുടഞ്ഞൊരീ ഗാനപഞ്ചമം
മൊഴി കാണാതിനിയും
വഴിതേടും വനിയിൽ
വിരിഞ്ഞു ജന്മനൊമ്പരം അരികിലിനിമക്കുയിലേ

സൂര്യസംഗീതം മൂകമാക്കും നിൻ
വാരിളം ചുണ്ടിൽ ഈണമാകാം ഞാൻ
പൂവിന്റെ പൂവിൻ മകരന്ദമേ ഈ
നോവിന്റെ നോവിൻ മിഴിനീരു വേണോ ?
ഈ പഴയ മൺ വിപഞ്ചിതൻ
അയഞ്ഞ തന്തിയിലെന്തിനനുപമ സ്വരജതികൾ ?

കർണ്ണികാരങ്ങൾ സ്വർണ്ണവർണ്ണങ്ങൾ
ചൂടിനിന്നാലും തേടുമോ തുമ്പി ?
ഹേമന്തരാവിൻ മാകന്ദമായെൻ
ജീവന്റെ ജീവൻ തേടുന്നു നിന്നെ
വന്നിതിലൊരു തണുവണി മലരിലെ മധുകണം
നുകരണം ഇളം കിളിയേ...